पाँच महिनाको गर्भ तुहिएपछि एक महिलाको मृत्यु

भाद्र १७ । पाँच महिनाको गर्भ तुहिएपछि भएको रक्तस्रावका कारण जाजरकोटमा एक महिलाको मृत्यु भएको छ । रक्तस्रावका कारण जिल्लाको पजारु गाविस वार्ड नं. ३ निवासी १९ बर्षीया रमिता बुढाको मृत्यु भएको हो । पजारुकै सेराखेरमा रहेको स्वास्थ्य चौकीमा लगिएपनि उपचार संभव नभएकाले नेपालगन्ज लैजाने क्रममा उनको ज्यान गएको श्रीमान खुमबहादुर बुढाले बताएका छन् । सुत्केरीको शरिरबाट धेरै रगत बगिसकेकोले र स्वास्थ्यचौकीमा भएको औषधीले पनि रक्तस्राव नरोकिएपछि नेपालगञ्ज रिफर गरिएको स्वास्थ्य चौकीका इन्चार्ज विष्णु गिरीले बताए । स्थानीय बागेश्वरी उच्च माध्यामिक विद्यालयमा ११ कक्षामा पढ्दै गरेकी रमिताको गएको वर्ष मात्र विवाह भएको बताइएको छ ।