काठमाडौं : नेकपा एमाले अध्यक्ष केपी ओली कसैको दबाबमा संविधान संशोधन नहुने बताएका छन् ।
थाइल्यान्डको बैंककमा स्वास्थ्य जाँच तथा
उपचार गराएर सोमबार काठमाडौं फर्किएका ओलीले विमानस्थलमा पत्रकारहरुसँग
भने, 'कसैले गर भन्दैमा संविधान संशोधन हुने होइन । लहड र वहकावमा
संविधानमा फेरबदल हुँदैन ।'
उनले संविधान संशोधनको आवश्यकता, औचित्य र
कारणबारे सरकार नै स्पष्ट नरहेको बताउँदै भने, 'पहिले सरकारले संशोधन
गर्नुपर्ने औचित्य र कारण स्पष्ट पार्नुपर्यो । अनि बल्ल त्यसमा छलफल चलाउन
सकिन्छ ।' उनले तत्काल संविधान संशोधन गर्नपर्छ भन्ने पक्षमा एमाले नरहेको
पनि स्पष्ट पारे।
सरकारले मधेसको माग सम्बोधन गर्न
भदौंभित्रै संविधान संशोधन विधेयक संसद्मा पेस गर्ने तयारी गरिरहेको छ।
संविधान संशोधन प्रस्ताव दर्ता गराएर मात्र प्रधानमन्त्री पुष्पकमल दाहाल
प्रचण्ड भारत जाने तयारीमा छन्।
प्रदेश सिमांकन मधेसको माग नभएको दाबी
गर्दै उनले भने, 'प्रदेश सिमांकन भइसकेको छ । यसलाई बदल्नुपर्ने माग मधेसको
होइन । कसको माग पुरा गर्न हामीले संशोधन गर्न लागेको हो, स्पष्ट
हुनुपर्यो ।'
ओलीले भने 'सङ्घीयताको सीमाङ्कन मधेसको
मात्र मुद्दा होइन, मुलुककै विषय हो । पहिलो संशोधनबाट मधेसी दलको माग
सम्बोधन भइसकेको छ । जिद्दी वा आग्रहका भरमा अर्को संशोधन हुँदैन । देशको
प्रतिष्ठा र इज्जतमा धक्का लाग्ने गरी अनुचित संशोधन गरिनु हुन्न ।'
ओलीले पहिले आर्थिक विधेयक फेल गराउनेहरु
अहिले पुरक बजेट ल्याउँछु भन्नु लजास्पद कुरा भएको बताए। बैंककमा रहँदा
भारतीय गुप्तचर संस्था र का प्रतिनिधिसँ भेटवार्ता भएको भन्ने चर्चा छ नि
भन्ने जिज्ञासमा उनले भने, 'यो वाहियात कुरा हो। मैले त्यहाँ कसैका
प्रतिनिधिलाई भेटेको छैन। भेट्न आवश्यक पनि छैन।'
0 comments:
Post a Comment