उत्तर कोरियाका शासक किमले आफू र आफ्नो परिवारलाई अंग्रेजी सिकाउन अमेरिकी नागरिक अपहरण गरेको खुलासा

एजेन्सी । अमेरिकाका २४ वर्षीय एक छात्र डेभिड स्नेडडोनको सन् २००४ मा चीनमा निधन भएको खबर सार्वजनिक भएसँगै ठूलो हल्लाखल्ला चलेको थियो । त्यतिबेला चीनमा निधन भएको मानिएका अमेरिकी छात्र डेभिडको निधन नभएको तथ्य अहिले आएर सार्वजनिक भएको छ। डेभिडलाई आफ्नो परिवारका सबै सदस्यलाई अंग्रेजी भाषा सिकाउन भनेर उत्तर कोरियाका तानाशाह शासक किम जोङ–उनले अपहरण गरेको खुलासा भएको छ। अंग्रेजी भाषामा पोख्त बनाउन किमले डेभिडलाई चीनबाट अपहरण गरेका थिए। दक्षिण कोरियाको प्रशासनिक निकायमा कार्यरत चोई सुङ–योङले हालै सार्वजनिक गरेको रिपोर्टमा उत्तर कोरियाका शासक किम धेरै अगाडिदेखि आफ्नो परिवारलाई अंग्रेजी भाषा सिकाउन एउटा राम्रो शिक्षकको खोजीमा थिए। उत्तर कोरियामा यस्तो व्यक्ति कोही नभेटेपछि उनले चीनबाटै अमेरिकी छात्र डेभिडको अपहरण गराएका थिए। डेभिड अहिले उत्तर कोरियाको राजधानी प्योङयोङमा बसोबास गर्छन्। डेभिडले प्योङयोङमा किमकी श्रीमती र दुई बच्चालाई अंग्रेजी सिकाउँछन्। जापानको याहुन्युजले पनि यस विषयमा समाचार प्रकाशन गरेको छ। छोरा प्योङयोङमा सुरक्षित रहेको खबर पाएपछि डेभिडका बाबु रोय र आमा क्याथलीनले खुसी व्यक्त गरेका छन्। डेभिडको रहस्यमय मृत्युको खबर पाएदेखि नै उनीहरू सशंकित बनेका थिए। यो खबर पाएपछि डेभिडका आमा–बुवाले आफ्नो छोरालाई घर फर्काउन प्रयास गरिने बताए। छोराको लाश नभेटिएपछि उनीहरू पहिलेदेखि नै डेभिड जिउँदै रहेको आशमा बाँचेका थिए। डेभिडको निधन चीनको युनान प्रान्तमा बाघ बसोबास गर्ने ठाउँमा भएको भन्ने खबर फैलिएको थियो। यो स्थान उत्तर कोरियासँग जोडिएको क्षेत्र हो। डेभिड सबैभन्दा पहिले सन् २००४ को अगस्ट १४ तारिखमा उत्तर कोरियाको एउटा रेस्टुँराबाट बाहिर निस्किदै गरेको भेटिएका थिए। त्यही वर्ष २६ अगस्टमा अमेरिका फर्किन सिओल विमानस्थलमा नपुगेपछि डेभिड हराएको खबर सार्वजनिक भएको थियो। डेभिडका अभिभावकले जानीबुझी उनको छोराको अपहरण गरिएको दाबी गरे। डेभिड कोरियाली भाषामा पनि पोख्त मानिन्छन्। त्यसैले अंगे्रजी सिकाउन उनीभन्दा उपयुक्त विकल्प अरु कोही नहुने निस्कर्ष निकाल्दै किमले उनको अपहरण गर्न लगाइएको आशंका गरिएको छ। उत्तर कोरियाली शाषकले विदेशी नागरिकलाई अपहरण गरेको यो नै पहिलो घटना होइन। जापानी सरकारका अनुसार सन् १९७७ देखि १९८३ को बीचमा उत्तर कोरियाका संस्थापक किम सुङले १७ जना विदेशी नागरिकको अपहरण गराएका थिए। अपहरण गरिएका सबै नागरिक २० वर्ष मुनीका थिए। अपहरणमा पर्ने सबैभन्दा कम उमेरका विदेशी नागरिकमा १३ वर्षका एक बच्चा पनि थिए। त्यतिबेला पनि भाषा सिक्न उनीहरूको अपहरण गरिएको बताइएको थियो। अर्को रिपोर्टअनुसार उत्तर कोरियाली शाषकले अहिलेसम्म सयौंको संख्यामा जापानीको अपहरण गरिसकेका छन्। यिनीहरूमा धेरै जसो सानो गाउँमा बस्ने युवा थिए। दक्षिण कोरियाको दाबीअनुसार सन् १९७७–७८ को बीचमा उत्तर कोरियाली जासुसले आफ्नो देशको पाँच हाइस्कुल छात्रको अपहरण गरेका थिए। उनीहरूको अपहरण दक्षिण कोरियाको रहनसहन सिक्न गरिएको भनाई छ। साभारः सेतोपाटि